Cocai

Cocai, stele nel sol, piume nel vento,
che come muli ve zoghè sul mar,
co' ve vardo, anca mi, vecio, me sento
pien de morbin, in voia de zogar;

de zogar sora l'onda che la s'cioca
con creste bianche tute ricamade;
de zogar col borin fresco che toca
de svolo l'aqua con le si' supiade.

Cocai, bianche de sol su la mareta
che canta e bala soto el blu del ciel,
e pur mi ve go visto anca in sacheta
su un mar de sporco, fermi per a pel

de l'aqua, scovolar la porcheria
do' che un bocon trovar sempre se pol!
Usei de neve, usei che pararia
fati solo per l'aria, el ciel, el sol,

anca voi, come noi, gavè sta piera
ligada ai pìe che no ve lassa andar;
anca voi, come noi, su l'aqua nera
serè le ale per poder magnar.

Dal Canzoniere di Sergio Pirnetti, raccolta La Lampara
( ed Lint 1973)

Contro la campagna di decimazione dei gabbiani del Comune di Trieste stampa e attacca al portone della tua casa.
Scarica il manifestino
Segnalami poi la tua adesione

L'utilizzo delle foto in qualunque forma xe soggetto all'autorizzazion dell'autor osia mia